‘Lufta’ e dytë e Ukrainës: Pas bombardimeve vjen dimri, mes acarit dhe sëmundjeve

Reshjet e para të dëborës kanë rënë në Ukrainë dhe OBSH ka dhënë alarmin. Për shkak të bombardimeve ruse gjysma e infrastrukturës së vendit është ose e dëmtuar, ose e shkatërruar.

Me elektricitet të kufizuar për përgatitjen e ushqimit, ngrohjes dhe menaxhimin e spitaleve, ky dimër do të jetë luftë për mbijetesë.

“Ne presim që 2 deri në 3 milionë njerëz të largohen në kërkim të ngrohjes dhe sigurisë. Ata do të përballen edhe me sfida shëndetësore, si infeksion në frymëmarrje, COVID-19, pneumoni, grip, pa harruar rrezikun e difterisë dhe fruthit mes popullsisë së pavaksinuar”, tha Hans Kluge, drejtor i OBSH për Evropën.

Banorët e Khersonit po i ndjejnë tashmë efektet. Janë bërë 10 ditë që kur rusët u tërhoqën nga qyteti dhe nuk ka ende ujë të pijshëm dhe elektricitet. Kur nata fillon të bjerë, i gjithë qyteti përfshihet nga i ftohti.

“Si mund ta bësh këtë? Ju jeni njerëz dhe na kuptoni ç’do të thotë të mos kesh ujë dhe energji. Por ta bësh këtë me qëllim… Ky nuk është sulm, është inat. Si mundën ta bënin?”, u shpreh një grua.

Autoritetet do të evakuojnë civilët nga Khersoni dhe Mikolaivi nga frika se dëmet në infrastrukturë janë shumë të rënda që njerëzit të durojnë dimrin.

Temperaturat pritet të bien në minus 20 gradë Celsius në disa zona. Centrali bërthamor i Zaporizhias, që prodhonte 25% të energjisë elektrike të Ukrainës, nuk gjeneron më elektricitet.

LEXONI GJITHASHTU

• BE jep 2.5 miliardë dollarë shtesë për Ukrainën
• Ministri kinez, homologut amerikan: Tajvani, vijë e kuqe që nuk duhet të kalohet
• Biden pas takimit me Xi Jinping: Nuk do të ketë ‘Luftë të re të Ftohtë’ me Kinën