Lufta Izrael-Iran, Rubio bisedon me aleatët e SHBA-së për zgjidhje

Sekretari i Shtetit i SHBA-së, Marco Rubio, zhvilloi takime dhe biseda telefonike me ministrat e jashtëm të disa prej aleatëve më të ngushtë të Amerikës, në përpjekje për të koordinuar qëndrimet mbi përshkallëzimin e konfliktit midis Izraelit dhe Iranit.

Të enjten, Rubio u takua në Londër me ministrin e Jashtëm britanik, David Lammy, ndërsa zhvilloi gjithashtu telefonata të ndara me ministren australiane të Jashtme, Penny Wong, ministrin francez, Jean-Noel Barrot, dhe ministrin italian, Antonio Tajani. Në fokus të diskutimeve ishte situata e tensionuar në Lindjen e Mesme, e cila është përshkallëzuar ndjeshëm që prej fillimit të luftës ajrore mes Iranit dhe Izraelit më 13 qershor.

Departamenti Amerikan i Shtetit bëri të ditur se palët ranë dakord në një pikë thelbësore: “Irani nuk mund të zhvillojë ose të pajisë kurrë një armë bërthamore”.

David Lammy konfirmoi përmes një postimi në platformën X se kishte rënë dakord me Rubio për rëndësinë e ndalimit të ambicieve bërthamore të Iranit. Ai theksoi gjithashtu se “situata në Lindjen e Mesme mbetet e rrezikshme” dhe se ekziston një dritare kohore prej dy javësh për të arritur një zgjidhje diplomatike.

Ndërkohë, Shtëpia e Bardhë njoftoi se Presidenti Donald Trump do të vendosë brenda dy javëve nëse Shtetet e Bashkuara do të përfshihen drejtpërdrejt në luftë, një vendim që mund të ndryshojë rrënjësisht dinamikën e konfliktit.

Në përpjekje për të ulur tensionet, ministrat e jashtëm të Britanisë, Francës, Gjermanisë dhe përfaqësues të Bashkimit Evropian pritet të takohen në Gjenevë me ministrin e Jashtëm të Iranit këtë të premte. Qëllimi i takimit është të shqyrtohen rrugët diplomatike për të shmangur përshkallëzimin e mëtejshëm dhe për të gjetur një zgjidhje të qëndrueshme për krizën.

LEXONI GJITHASHTU:

• Sulm masiv në Ukrainë: 14 të plagosur, mes tyre tre zjarrfikës
• Zëvendësministri i Jashtëm i Iranit: Përfshirja e SHBA-së do sillte ferr për rajonin