Zëvendësministri i Jashtëm i Iranit: Përfshirja e SHBA-së do sillte ferr për rajonin

Zëvendësministri i Jashtëm i Iranit, Saeed Khatibzadeh, ka paralajmëruar se përfshirja e Shteteve të Bashkuara në sulmet izraelite do të kishte pasoja katastrofike për Lindjen e Mesme. Në një intervistë për BBC-në, ai deklaroi se një hap i tillë do të “shkaktonte ferr për të gjithë rajonin”.

Khatibzadeh theksoi se “kjo nuk është lufta e Amerikës” dhe paralajmëroi se nëse presidenti amerikan Donald Trump përfshihet, “do të mbahet mend si një president që hyri në një luftë ku nuk i përkiste”. Sipas tij, çdo ndërhyrje nga SHBA do të thellonte konfliktin dhe do të vononte përfundimin e “mizorive brutale”.

Këto komente vijnë në një kohë tensionesh të larta, pas një sulmi me raketa iraniane që goditi afërsinë e spitalit Soroka në Izraelin jugor. Mediat shtetërore iraniane raportuan se objektivi ishte një bazë ushtarake pranë spitalit dhe jo vetë qendra mjekësore. Megjithatë, Ministria e Shëndetësisë izraelite raportoi se 71 persona u plagosën si pasojë e sulmit në Qendrën Mjekësore Soroka.

Në kundërpërgjigje, ushtria izraelite njoftoi se kishte goditur objektiva të rëndësishme bërthamore në Iran, përfshirë reaktorin “joaktiv” të ujit të rëndë në Arak dhe uzinën e pasurimit të uraniumit në Natanz.

Ndërkohë, Shtëpia e Bardhë ka deklaruar se Presidenti Trump do të marrë një vendim për përfshirjen ose jo të SHBA-ve në këtë konflikt brenda dy javëve të ardhshme. Situata mbetet tepër e tensionuar, me rrezik të shtuar për një përshkallëzim të mëtejshëm ushtarak në rajon.

LEXONI GJITHASHTU:

• Sulm me granatë në rezidencën e ambasadorit norvegjez në Izrael, autorët në kërkim
• Britania e Madhe dhe SHBA-të: Irani nuk duhet të pajiset kurrë me armë bërthamore