Lufta me Iranin, ambasadorja e Izraelit: BE duhet të jetë në krahun e duhur të historisë

Ambasadorja e Izraelit në vendin tonë, Galit Peleg tha në një intervistë për Euronews Albania se vendet e NATO duhet të mbështesin SHBA dhe Izraelin në fushatën ushtarake të nisur kundër Iranit. Sipas saj për të përmbushur misionin ndaj një regjimi diktatorial si Irani duhet të shkohet përtej interesave individuale të një vendi.

“Sa i përket NATO-s dhe BE-së: së pari, jo të gjitha vendet e NATO-s na mbështeten. Vendete të mëdha, së pari, dëgjuan presidentin Trump, siç iu përgjigja gazetares japoneze lidhur me elementin surprizë të këtij operacioni. Por pyetja që duhet të shtrojmë është: ku do të ishim sot nëse Amerika nuk do të kishte ndërhyrë në Luftën e Dytë Botërore? Pra, në disa raste duhet të bashkëpunojmë për të mposhtur një forcë të keqe. Nuk di se cila do të ishte forma që do të kishte bota pa ndërhyrjen e Amerikës, si do të ishte Shqipëria dhe vendet evropiane.

Për të mbështetur një fushatë të tillë, mendoj se duhet të shkojmë përtej interesave individuale të një vendi. Kur kemi regjimin jo demokratik ekstremist që vret njerëzit e tij dhe përhap terror edhe jashtë vendit, kur kemi sulme terroriste të mbështetura nga Irani, sic kanë ndodhur në Argjentinë dhe vende të tjera, dhe ti të rrish duke parë ata që bëjnë bomba bërthamore, duhet të llogarisësh mirë hapat e tua. Çështja nuk është nëse vendet e BE-së ishin të informuara më parë, por që këto vende duhet të jenë në pjesën e duhur të historisë.

Çështja tjetër është që lufta të mos arrijë në dyert e tyre. Deri më sot nuk ka pasur interes të Iranit për të goditur Londrën me raketa, por pamë që Irani sulmoi Dubain, që deri dje e kishte vend mik, dhe sot, pikërisht, patëm viktima. Ndaj kemi të bëjmë me një regjim që nuk mund t’i besojmë dhe nuk mund të qëndrosh indiferent duke parë të tjerët që bëjnë punën për ty”, tha ambasadorja.