Mijëra palestinezë të zhvendosur gjatë luftimeve janë grumbulluar në Veri të Gazës me shpresën për tu kthyer në banesat nga u zhvendosen për shkak të luftimeve një vit më parë. Por Izraeli deklaroi se kthimi i banorëve do të mundësohet i plotë, vetëm pasi Hamsai të zbatojë marrëveshjen për lirimin e gjithë pengjeve.
Tërheqja e ushtrisë izraelite nga zonat e populluara dhe lejimi i palestinezëve të zhvendosur të kthehen në shtëpi është një nga pikat e rëna dakord në armëpushimin midis Izraelit dhe Hamasit, i cili hyri në fuqi më 19 janar. Një pjesë tjetër e marrëveshjes së armëpushimit ishte shkëmbimi i pengjeve të Hamasit me të burgosur palestinezë.
Të shtunën, ndodhi shkëmbimi i dytë ku Hamasi liroi 4 pengje, ndërsa Izraeli 200 palestinezë nga burgjet.
Të afërmit e pengjeve ende të mbajtura nga militantët e Hamasit në Gaza kanë bërë thirrje presidentit amerikan Donald Trump që të ushtrojë presion mbi Benjamin Netanyahu për të vazhduar me fazën e dytë të marrëveshjes së armëpushimit.
Faza e dytë e marrëveshjes përfshin hapa drejt një fundi të përhershëm të luftës në Gaza. Sipas paktit, Hamasi do të lirojë gjithë pengjet e mbetura, ndërsa Izraeli pranon të lirojë rreth 1 mijë palestinezë.
Ushtria izraelite gjithashtu do të përfundojë një tërheqje të plotë të trupave nga Gaza gjatë kësaj faze. Faza e tretë dhe e fundit përfshin rindërtimin e Gazës, me Hamasin që pritet të dorëzojë trupat e pengjeve që vdiqën në robëri në këmbim të një plani për rindërtimin e Rripit nga Izraeli. Hamasi shkaktoi luftën në tetor 2023 me sulmin e tij përtej kufirit në Izrael, ku u vranë rreth 1,200 njerëz dhe 250 të tjerë u morën peng dhe u dërguan në Gaza.
Izraeli u përgjigj me një ofensivë shkatërruese që ka vrarë më shumë se 46,000 palestinezë, sipas zyrtarëve lokalë të shëndetësisë. OKB-ja tha të shtunën se më shumë se 13,000 fëmijë janë vrarë në luftime.
LEXONI GJITHASHTU:
- Kabineti i Sigurisë të Izraelit merr vendimin për armëpushimin në Gaza
- Të paktën 113 palestinezë të vrarë në Gaza që nga shpallja e armëpushimit
