Luftë në impiantin atomik të Zaporizhias, frikë për një katastrofë

Banorët e qytetit Marganet në Ukrainë, po llogarisin pasojat e sulmit të fundit rus, nga i cili 13 persona mbetën të vrarë.

Kievi pretendon se raketat u qëlluan nga territori i impiantit bërthamor të Zaporizhias, që ndodhet menjëherë pas lumit Dnipro.

Trupat ruse kontrollojnë impiantin dhe janë akuzuar nga Ukraina se e kanë kthyer atë në një bazë ushtarake, duke e bërë të vështirë për palën ukrainase që të kundërsulmojë.

Përreth centralit atomik ka pasur shumë përleshje dhe bomba të shumta kanë rënë brenda perimetrit, duke shqetësuar komunitetin ndërkombëtar për një katastrofë nukleare.

Nga ana tjetër, Rusia fajëson Ukrainën dhe ka kërkuar mbledhjen e Këshillit të Sigurimit të OKB-së për të diskutuar situatën.

Në të njëjtën kohë, vendet e G7-s kanë kërkuar që Rusia t’ia kthejë menjëherë kontrollin e centralit palës ukrainase dhe e akuzojnë Moskën se po vendos të gjithë rajonin në rrezik.

Më herët gjatët javës, një zyrtar i ushtrisë ukrainase deklaroi se siguria në impiant nuk mund të garantohet, pasi rusët mbajnë nën kontroll teknikët ukrainas, por njësitë e centralit në përgjithësi janë të mbrojtura.

Në frontin tjetër ka një presion në rritje ndaj Evropës për të ndaluar turistët rusë. Duke cituar presidentin e tij, ministri i Jashtëm ukrainas u ka kërkuar strukturave ndërkombëtare të ndërpresin dhënien e vizave.

“Të vizitosh Evropën është një privilegj, jo një e drejtë për pushuesit”, ka thënë Dmytri Kuleba në Twitter.

Ndërkohë, bombardimet ruse në veri-lindje të vendit lanë 2 persona të vdekur në fshatin Starji Saltiv, në rajonin e Kharkivit.

LEXONI GJITHASHTU

• NATO intensifikon stërvitjet, luftëanija amerikane në Finlandë
• Kina: SHBA-të janë nxitësit kryesorë të krizës në Ukrainë
• Imazhet satelitore, baza ajrore ruse në Krime e dëmtuar rëndë