Luftime të ashpra në Ukrainë, Rusia sulmon Zaporizhian. Zelensky jep lajmin e mirë

Dy persona u vranë dhe 7 të tjerë u plagosën në një sulm me raketa të kryer nga Rusia në qytetin ukrainas të Zaporizhias. Zyrtarët vendas deklaruan se pala ruse kishte vënë në shënjestër një zonë të banuar.

Mediat ukrainase raportojnë gjithashtu se një depo karburantesh ishte sulmuar në rajonin perëndimor të Rivnes dhe se 28 shpërthime ishin verifikuar në rajonin e Samit, si pasojë e bombardimeve ruse.

Për fat të mirë, sulmet nuk shkaktuan viktima.

“Po përgatisja ushqimin dhe për një sekondë mendova të shkoja në dhomën tjetër. Sapo dola në korridor ndodhi shpërthimi. Në atë moment bashkëshorti dhe fëmijët ishin jashtë. Po të kishin qenë në kuzhinë do të ishin lënduar”, deklaroi një banore e zonës.

Ndërkohë, presidenti Zelensky njoftoi se Gjermania dhe Ukraina kishin rënë dakord për furnizimin me dy sisteme të reja të mbrojtjes ajrore të llojit “Patriot”.

“Sot kemi një lajm të mirë nga Gjermania. Në bazë të një marrëveshjeje me kancelarin Scholz kemi në dispozicion sisteme të reja “Patriot”. Faleminderit shumë, Olaf. Këto mjete na duhen për të mbrojtur popullin tonë nga terrori rus. Faleminderit Gjermanisë për përmbushjen e kësaj marrëveshjeje, që do të shpëtojë mijëra jetë njerëzish. Ajo do të na sjellë më afër krijimit të një mburoje ajrore për Ukrainën dhe do të ndihmojë njerëzit, qytetet dhe fshatrat”, deklaroi Zelensky.

Ndërkohë, koordinatorja e ndihmave humanitare për Ukrainën, Denise Brown vizitoi lokalitetin Pokrovsk në rajonin e Donjeckut, ku të hënën dy sulme masive lanë dhjetëra civilë të vrarë dhe të plagosur. Brown u takua me autoritetet lokale për të përcaktuar sasinë e ndihmave të nevojshme.

LEXONI GJITHASHTU:

• Vuçiç paralajmëron Ukrainën: Do humbiste çdo gjë brenda ditës po njohët Kosovën
• Pesë të vrarë dhe mbi 30 të plagosur nga sulmet ruse në lindje të Ukrainës