Luhatjet në tregje| Nafta ulet, ushqimet jo

Çmimet e ushqimeve bazë që kontrollohen nga Bordi i Transparencës qëndrojnë të fiksuara prej disa muajsh.

Me gjithë luhatjet në tregjet ndërkombëtare, në vendin tonë ato nuk rishikohen, sikundër ndodh me karburantet.

Çmimi i naftës është ulur për herë të parë që pas nisjes së luftës në Ukrainë, nën 200 lekë/ litër. Edhe benzina e gazi po tregtohen më lirë këtë javë. Çmimet në bursa kanë prekur nivelin më të ulët me naftën që shitet 75 dollarë fuçia dhe benzinën po ashtu që kuotohet në nivelet e muajit janar.

Por këto ndryshime nuk janë reflektuar te mallrat ushqimorë. Të paktën, për miellin, orizin, sheqerin dhe vajin, ku çmimet caktohen nga Bordi i transparencës, një rishikim i pjesshëm është bërë  në muajin qershor dhe një i dytë në muajin shtator.

Bordi i ushqimeve u ngrit paralelisht me bordin e karburanteve, për të mbrojtur konsumatorët nga abuzimet në tregje, por deri më tani ka marrë 4 vendime, edhe pse luhatjet në tregjet e huaja kanë qenë të mëdha. Madje, sot çmimi i vajit të lulediellit në bursë është i njëjtë me çmimin e janarit, kur një litër vaj këtu tregtohej 170 lekë.

LEXONI GJITHASHTU:

• Musliu: Në 2023 mund të rritet çmimi i biletës për transportin urban në Kosovë