Macron i bën thirrje Putinit të “kthehet në tryezën e bisedimeve” 

Presidenti francez Emmanuel Macron i bëri thirrje udhëheqësit rus Vladimir Putin të “kthehet në tryezën e bisedimeve” dhe premtoi se Parisi do të furnizojë Ukrainën me sisteme të mbrojtjes ajrore pas një serie të re bombardimesh masive në vend.

Në një intervistë televizive, Macron kritikoi homologun e tij rus se, siç tha ai, “vendosi” të përfshijë Evropën në luftë me sulmet e fundit të raketave dhe urdhrin e mobilizimit”.

“Sot, mbi të gjitha, Vladimir Putin duhet të ndalojë këtë luftë, të respektojë integritetin territorial të Ukrainës dhe të kthehet në tryezën e bisedimeve”, tha Macron për televizionin France 2.

Bombardimet ruse të kësaj jave që synonin infrastrukturën energjetike dhe civilët ishin një përpjekje për të thyer rezistencën ukrainase, tha presidenti francez, duke shpjeguar komentin e tij të mëparshëm se “përshkallëzimi e ka sjellë luftën në një fazë të re”.

Macron i qëndroi edhe një herë refuzimit të tij për t’i dhënë fund dialogut me liderin rus, pavarësisht se u kritikua edhe nga ukrainasit. Ai deklaroi se do të vazhdojë të bisedojë me Putinin “kur të jetë e nevojshme”.

Ai përsëriti se përfundimisht do të varet nga Ukraina të vendosë se kur do të plotësohen kushtet për negociata dhe se qëllimi i deklaruar është i qartë: “një kthim në kufijtë e vitit 1991”, përpara aneksimit të paligjshëm të Krimesë nga Rusia në 2014 dhe katër rajoneve të Ukrainës, në fund të shtatorit, raporton Euronews.

LEXONI GJITHASHTU:

• Çfarë i kërkoi Putin-Erdoganit? Detaje nga takimi
• Propozimi i Putin: Turqia të bëhet qendër energjetike për të gjithë Evropën