Macron përkujton për të dytin vit radhazi 260 viktimat e terrorit në Francë

Emmanuel Macron ka përkujtuar sot për të dytin vit radhazi viktimat e terrorizmit në Francë.

Në ceremoni ishin të pranishëm shumë personalitete franceze, përfshirë dhe ish-presidentin Nicolas Sarkozy.

Macron së bashku me gruan e tij Briggite, kanë kryer homazhe pranë një monumenti ‘La Parole Port’, e cila përfaqëson një grua pa kokë, monument i cili i dedikohet viktimave të sulmeve. Më pas presidenti francez takoi dhe 13 kryetarët e shoqatave të viktimave.

Që nga janari i vitit 2015, sulmet kanë lënë më shumë se 260 viktima në Francë.

Ndër sulmet më vdekjeprurëse kanë qenë në Saint-Denis në Paris me 130 viktima dhe ai i 14 korrikut të vitit 2016 në Nicë me 86 të vdekur.

Data 11 mars është zgjedhur si dita evropiane e përkujtimit të viktimave të terrorizmit duke iu referuar sulmeve në Madrid të vitit 2004.

Sipas pallatit Elysee ‘kërcënimi terrorist’ vazhdon që të mbetet i lartë, duke specifikuar që 33 sulme të mundshme janë zbuluar duke filluar nga viti 2017.