Maduro fiton zgjedhjet në Venezuelë, opozita: Kemi marrë 70% të votave

Presidenti Nicolás Maduro ka fituar zgjedhjet presidenciale të Venezuelës, sipas rezultateve të pjesshme të shpallura nga Këshilli Zgjedhor.

Kreu i Këshillit Kombëtar Zgjedhor (CNE), Elvis Amoroso – i cili është një aleat i ngushtë i Presidentit – tha se me 80% të votave të numëruara, Maduro kishte 51% të votave, krahasuar me 44% për rivalin e tij kryesor.

Opozita venezueliane hodhi poshtë njoftimin e Këshillit Zgjedhor dhe kundërshtoi rezultatin e publikuar.

Opozita tha se kandidati i saj, Edmundo González, kishte fituar me 70% të votave dhe këmbënguli se ai ishte presidenti i zgjedhur në mënyrë të ligjshme.

Udhëheqësja e opozitës María Corina Machado tha se Edmundo González ishte presidenti i ligjshëm i Venezuelës.

Machado shtoi se sipas exit poll-eve González kishte një avantazh prej 40 pikë përqindjeje ndaj presidentit aktual.

Partitë opozitare ishin bashkuar pas zotit González në një përpjekje për të rrëzuar presidentin Maduro pas 11 vitesh në pushtet.

Sondazhet e opinionit të kryera përpara zgjedhjeve kishin sugjeruar që zoti González do ta mundte presidentin.

Rezultati i zgjedhjeve pritet të ketë pasoja të rënda për vendin e Amerikës Latinë me 29.4 milionë banorë.

Gjatë 10 viteve të fundit, 7.8 milionë njerëz janë larguar nga Venezuela për shkak të krizës ekonomike dhe politike në të cilën vendi u zhyt nën administratën Maduro.

Sondazhet e kryera në prag të zgjedhjeve sugjerojnë se eksodi tani mund të rritet, me një sondazh që sugjeron se një e treta e popullsisë do të emigronte.

Me emigracionin një temë të nxehtë në zgjedhjet amerikane, qeveria në Uashington, si dhe shtetet e Amerikës Latine në të cilat venezuelianët kanë emigruar masivisht, janë prekur nga ajo që ndodh në vendin e Andeve.