Maduro sfidon Trump pas shpërblimit për arrestimin e tij: Ja ku jam frikacak

Presidenti i Venezuelës, Nicolás Maduro, ka reaguar ashpër ndaj vendimit të fundit të administratës amerikane, e cila nën drejtimin e Presidentit Donald Trump, ka dyfishuar në 50 milionë dollarë shpërblimin për arrestimin e tij.

Në një video që tashmë është bërë virale, Maduro i drejtohet drejtpërdrejt Trump-it me fjalë sfiduese:

“Ja ku jam. Frikacak, eja nëse mundesh. Jam këtu në Miraflores, dil përballë meje frikacak.”

Shtetet e Bashkuara e akuzojnë presidentin venezuelian si një nga trafikantët më të mëdhenj të drogës në botë dhe si bashkëpunëtor të karteleve që kanë përmbytur tregun amerikan me kokainë të pasuruar me fentanyl.

Në një deklaratë zyrtare, qeveria amerikane theksoi se, “nën udhëheqjen e Presidentit Trump, Maduro nuk do t’i shpëtojë drejtësisë dhe do të mbahet përgjegjës për krimet e tij.”

Nicolás Maduro u padit në vitin 2020 në Gjykatën Federale të Manhattanit, gjatë mandatit të parë të Presidentit Trump, me akuza për narkoterrorizëm dhe komplot për trafik ndërkombëtar droge, së bashku me disa nga aleatët e tij më të afërt.

Fillimisht, Uashingtoni kishte vendosur një shpërblim prej 15 milionë dollarësh për arrestimin e tij, shifër që më vonë u rrit në 25 milionë gjatë administratës Biden – po aq sa u ofrua për kapjen e Osama bin Laden. Me vendimin e fundit të administratës Trump, shuma arrin në 50 milionë dollarë.

Në të njëjtën kohë, Departamenti amerikan i Drejtësisë ka konfiskuar mbi 700 milionë dollarë në asete të lidhura me Maduro-n, përfshirë dy avionë privatë dhe rreth 7 ton kokainë.

LEXONI GJITHASHTU: 

• Amerika jep 50 mln euro për “kokën” e Maduros, reagon qeveria në Venezuelë
• SHBA ofron shpërblim 50 mln $ për arrestimin e liderit të Venezuelës, Nicolás Maduro