Magyar në Bruksel, takim me Von der Leyen për fondet e BE-së: Do të arrij një marrëveshje politike

Kryeministri hungarez, Peter Magyar tha të premten se do të arrijë një marrëveshje politike mbi lirimin e fondeve të ngrira të Bashkimit Evropian në një takim me Presidenten e Komisionit Evropian Ursula von der Leyen më vonë gjatë ditës.

Magyari mbërriti në Bruksel të enjten për të negociuar lirimin e fondeve të BE-së që ishin ngrirë gjatë qeverisë së mëparshme të udhëhequr nga Viktor Orban për shkak të shqetësimeve mbi sundimin e ligjit dhe garancitë kundër korrupsionit.

“Në orën 13:00 do të zhvilloj bisedime me Presidentin e Komisionit Evropian dhe do të përfundojmë marrëveshjen politike mbi financimin nga BE të mijëra miliardë forintave që i takojnë vendit tonë”, shkroi Magyar në një postim në Facebook.

Të enjten, Magyar tha se një marrëveshje për fondet e BE-së ishte shumë afër, pasi kishte marrëveshje me Brukselin për shumë çështje, megjithëse mbetën disa pikëpyetje në lidhje me luftën kundër korrupsionit.

Qeveria e re e Hungarisë është nën presion për të zhbllokuar pjesën e vendit nga paratë e fondit të rimëkëmbjes së BE-së para afatit të 31 gushtit: 6.5 miliardë euro në grante dhe 3.9 miliardë euro në kredi të lira.

Rreth 7 miliardë euro në fondet strukturore të BE-së janë gjithashtu të ngrira, por vendi ka disa vite për të aksesuar këto para.