Mahmood dhe Blanco fitues të Sanremos

Është përmbyllur me fitoren e dyshes Mahmood dhe Blanco festivali italian i muzikës Sanremo.

Kënga e tyre “Brividi” ishte cilësuar si favorite për të triumfuar, dhe bëhet kështu akti që do të përfaqësojë Italinë në Eurovision, kompeticion që do të mbahet në muajin maj në Torino.

Ndër 25 artistët garues që ishin pjesë e 5 netëve të festivalit, vetëm 3 ja dolën të kualifikoheshin në raundin e superfinales.

Një prej tyre ishte Elisa me këngën e saj “O forse sei tu”.

Kjo ishte paraqitja e saj e dytë në Sanremo, pas fitores në vitin 2001.

Në superfinale arriti gjithashtu edhe ish-prezantuesi i këtij festivali Gianni Morandi, me këngën e tij “Apri tutte le porte”.

Këngëtari veteran që përfaqësoi Italinë në Eurovisionin e 1970, u rendit i treti në këtë edicion të Sanremos.

Kujtojmë se Italia fitoi Festivalin Europian të Këngës vitin e kaluar me “Zitti e buoni” nga grupi Måneskin, që i jep të drejtën të jetë organizatore e kompeticionit në maj.

LEXONI GJITHASHTU:

• Sanremo shpall fitues Maneskin, Francesca Michielin dhe Ermal Meta u renditën në vend të dytë dhe të tretë