Manastirliu i përgjigjet Bashës për gjendjen e pandemisë: Shqipëria në pozita më të mira se rajoni

Ministrja e Shëndetësisë Ogerta Manastirliu iu drejtua të martën udhëheqësit të opozitës, Lulzim Basha që të rishqyrtojë qëndrimet e tij për sa i përket gjendjes së pandemisë së COVID-19 në Shqipëri.

Përmes një postimi në Facebook, Manastirliu i kërkoi Bashës që të pranojë se qeveria ka mirë-menaxhuar situatën.

Manastirliu shprehet se prej muajit korrik e deri më sot është “dyfishuar numri i testimeve” dhe kjo do të vijojë të rritet “bazuar në strategjinë për kufizimin e përhapjes së virusit”. Ajo theksoi se në bazë të strategjisë së koordinuar me ekspertët e shëndetësisë “ekipet në terren, testojnë, gjurmojnë dhe izolojnë mbi 80% e rasteve brenda 48 orëve”.

“Shqipëria është ndër të paktat vende të rajonit ku mjetet e mbrojtjes personale për stafet mjekësore nuk kanë munguar për as edhe një sekondë, që kur u shfaqën rastet e para të infeksionit në Shqipëri,” – pretendoi ministrja duke theksuar se vendi ka shumë pak mjekë dhe personel shëndetësor të infektuar.

Ministrja këmbënguli se “shifrat e nxjerrin Shqipërinë në një pozicion më të mirë se sa shumë vende të rajonit” ndërkohë që shpërblimet 1 mijë dhe 500 euro për punonjësit e shëndetësisë “janë realitet prej shtatë muajsh” dhe “do të zgjasin deri ditën e fundit të kësaj pandemie”.

Reagimi i ministres vjen pak kohë pasi kryetari i Partisë Demokratike, Lulzim Basha deklaroi se situata e pandemisë në vend “është në prag katastrofe”.

Pas një konsultimi që ai tha se kishte kryer me ekspertë të shëndetësisë, Basha këmbënguli se Shqipëria vazhdon të ketë numër të ulët testesh, ku sipas tij duhet të bëhen mesatarisht 2,500 teste në ditë dhe jo 800-850, ndërsa ende nuk ka asgjë konkrete rreth vaksinimit kundër gripit të stinës.

Lexoni gjithashtu:

Situata e pandemisë, Basha takim me mjekët: Jemi në prag të katastrofës