Marrëveshja Izrael- Hamas, zyrtari amerikan: 90% e dokumentit është dakordësuar

Një zyrtar i lartë i administratës amerikane tha të mërkurën se janë dakordësuar 90% e kushteve të marrëveshjes së armëpushimit dhe marrëveshjes së pengjeve në Gaza.

“Nëntëdhjetë për qind e kësaj marrëveshjeje është rënë dakord dhe bazohet në kushtet që kishte edhe Hamasi në propozimin e vet”, u tha gazetarëve zyrtari, duke folur në kushte anonimiteti.

“Një paragraf ka një rregullim shumë teknik dhe tre paragrafët e tjerë kanë të bëjnë me shkëmbimin e të burgosurve me pengje, gjë që edhe vetë teksti i Hamasit i 2 korrikut thotë në mënyrë eksplicite se duhet ende të negociohet”, shtoi zyrtari.

Zyrtari identifikoi tre komponentë kryesorë të marrëveshjes: ndihma humanitare dhe përfitime për Gazanët, shkëmbimi i pengjeve dhe të burgosurve dhe marrëveshjet e armëpushimit.

Ai theksoi se faza e parë e marrëveshjes trefazore nuk ka përfshirë kurrë një “tërheqje të plotë të forcave izraelite”.

Sipas zyrtarit, një propozim i paraqitur nga SHBA, Egjipti dhe Katari më 16 gusht synonte të kapërcente boshllëqet mbi shkëmbimin e të burgosurve, komponent të cilin e cilësoi si “mjaft të ndërlikuar”.

LEXONI GJITHASHTU:

• Gaza nis fazën e dytë të fushatës së vaksinimit ndaj poliomielitit
• Si u bë faktor kryesor Hezbollahu në luftën Izrael-Hamas