Martohet kryeministri australian Anthony Albanese, ceremonia e veçantë 

Kryeministri Australian Anthony Albanese ka bërë një pushim të shkurtër nga qeverisja e vendit për t’u martuar me Jody Haydon.

Albanese u bë udhëheqësi i parë australian që u martua gjatë kohës që ishte në detyrë. Çifti lidhi kurorë në Canberra të shtunën pasdite, një ditë pas seancës së fundit të vitit parlamentar.

“Jemi të kënaqur të ndajmë dashurinë dhe angazhimin tonë për të kaluar jetën tonë të ardhshme së bashku, përpara familjes dhe miqve tanë më të ngushtë”, tha Albanese, sipas BBC-së. Kryeministri australian postoi gjithashtu foto nga dasma e tij në Twitter, të cilat i shoqëroi me mbishkrimin: “Të dua Jody”.

Deri në ditën e madhe, planet e dasmës u mbajtën sekret për shkak të shqetësimeve për sigurinë. Prindërit e Jodie-s ishin të pranishëm, si dhe djali i Albanese-s nga një martesë e mëparshme, Nathan. Disa ministra të qeverisë morën pjesë në ceremoni.

Qeni i Albanese, Toto, mbante unazat e martesës ndërsa çifti doli nën tingujt e këngës “Signed, Sealed, Delivered (I’m Yours)” të Stevie Wonder.

Kryeministri ndau gjithashtu një video në llogaritë e tij zyrtare në mediat sociale ku tregon çiftin e lumtur duke dalë.

Married💍❤️💍 pic.twitter.com/mSzojtBF2I

— Anthony Albanese (@AlboMP) November 29, 2025

Në pritje, vallëzimi i parë i çiftit ishte me këngën “The Way You Look Tonight” të Frank Sinatrës. Të ftuarit pinë birra nga kanaçe me fotografi të çiftit mbi to.

Anthony Albanese dhe Jodie Haydon do ta kalojnë muajin e mjaltit në Australi. Sa i përket njohjes së tyre, ajo ka ndodhur në vitin 2020 në një darkë në Melbourne, kur partia e Albanese ishte në opozitë.