Masakër në Brazil, 45 të vrarë gjatë ndërhyrjes së policisë në lagjet periferike

Tre operacione të policisë, të zhvilluara në tre rajone të ndryshme të Brazilit, kanë lënë pas të paktën 45 persona të vdekur.

Në operacionin e fundit, në Rio de Zhaneiro, policia deklaroi se kishte reaguar në një shkëmbim zjarri në një lagje periferike, duke vrarë 10 persona.

Më herët, 16 persona humbën jetën në përleshjet e armatosura që u verifikuan gjatë operacionin 5-ditor të zhvilluar në Sao Paolo, i koduar “Mburoja”.

Ndërsa në rajonin veri-lindor të Bahias, autoritetet lokale njoftuan se 19 të dyshuar kanë mbetur të vrarë që prej së premtes.

Gjithashtu, gjatë operacionit në Sao Paolo u arrestuan 58 persona. Aksioni policor atje nisi pasi një oficer i forcave speciale mbeti i vrarë në qytezën bregdetare Garuja.

Operacioni në këtë lokalitet u kritikua nga ministri i Drejtësisë së Brazilit, Flavio Dino, i cili tha se reagimi i forcave të rendit nuk ishte në përpjesëtim me krimin e kryer.

Edhe Amnesty International reagoi lidhur me ngjarjen, duke deklaruar se ndërhyrja e policisë ishte qartazi një hakmarrje për oficerin e vrarë.

Ndërsa në Rio de Zhaneiro, një bos i drogës dhe një trafikant ishin mes 10 personave që u vranë të mërkurën. 4 të tjerë mbetën të plagosur, përfshirë një oficer policie.

LEXONI GJITHASHTU:

• U qëllua dy herë me thikë, ndërron jetë 33-vjeçari në Angli
• Pamje të rënda| Futbollisti ndërron jetë pas sulmit nga krokodili