Matthew Palmer thotë se liderët e Ballkanit Perëndimor duhet të jenë më konkretë në realizimin e objektivave

I Dërguari Special i SHBA për Ballkanin Perëndimor, Matthew Palmer, gjatë fjalës së tij në “Forumin e Prespës” u shpreh se liderët e rajonit duhet të jenë më konkretë në realizimin e objektivave ekonomike dhe politike.

Ai nënvizoi se mbështet nismat e BE për të përkrahur rajonin duke shprehur edhe zhgënjimin që Shqipëria dhe Maqedonia e Veriut nuk mundën të nisnin negociatat me unionin.

“Duhet të marrin masa, duhet të ushtrojnë presion për të realizuar dhe zgjidhur çështjet politike në nivel të brendshëm dhe jashtë vendit për të fuqizuar demokracitë e tyre”, u shpreh ndër të tjera z. Palmer.

Ai theksoi se dialogu Prishtinë-Beograd i udhëhequr nga BE dhe i dërguari i saj Lajçak gëzon mbështetjen e SHBA-së, ndërsa shtoi se nëse vendet e Ballkanit Perëndimor dëshmojnë përkushtim në rrugën europiane edhe përkrahja apo veprimet nga Bashkimi Europian duhet të jenë proporcionale, me përpjekjet e shteteve për integrim.

Në forumin e sotëm marrin pjesë edhe presidenti i Maqedonisë së Veriut, Stevo Pendarovski, presidenti i Malit të Zi, presidenti i Sllovenisë, Borut Pahor, kryeministri i Serbisë Ana Brnabic, kryeministri i Kosovës, Albin Kurti dhe kryeministri i Shqipërisë, Edi Rama.

Tema e diskutimit është  ‘Ballkani Perëndimor, Puzzle i munguar për plotësimin e Evropës’ dhe përqendrohet në nëntë pika, përfshirë rolin e BE-së në botë, demokracinë evropiane, vlerat, të drejtat, sundimin e ligjit, sigurinë, migrimin, ndryshimin eklimës, mjedisin dhe shëndetin.

LEXONI GJITHASHTU:

• Sot zhvillohet “Forumi i Prespës”, liderët e rajonit mblidhen në Shkup
• Rama, Vuçiç dhe Zaev thirrje të përbashkët BE dhe SHBA për të mbështetur Ballkanin Perëndimor