Mbahet festivali i muzikës së Dhomës në Durrës

Festivali Ndërkombëtar i Muzikës së Dhomës është zhvilluar për herë të parë jashtë “dhomës”.

“Kepi i Rodonit” mirëpriti një nga koncertet e festivalit në edicionin e tij të 17-të.

Violinistja, njëherësh organizatorja, Nevila Kalaja na tregon përse kjo zgjedhje.

 “Ideja është për të shkuar më afër turizmit kulturor. Ide dhe kërkesa që ne kemi pasur që në edicionin e parë të këtij festivali. Pas 8 koncerteve që ne kemi dhënë brenda Muzeut Arkeologjik, vijmë sonte këtu në Kepin e Rodonit, në këtë ambient të jashtëzakonshëm, pikërisht për të treguar që muzika duhet të jetë pranë njerëzve në këto ditë të këndshme të verës dhe pushimeve,” – u shpreh ajo.

Nën yje, aty ku natyra piktoreske takon historinë sigurisht që nuk munguan as spektatorët. Secilën prej performancave ata e vlerësuan me duartrokitje.

Me këtë vlerësim Kalaja aspiron që zhvillimi i festivalit në ambiente të tilla të hapura të kthehet në traditë.

 “Shpresoj që njerëzit të kënaqen dhe të hapin një faqe të re në zhvillimin e Festivalit Ndërkombëtar të Muzikës së Dhomës,” – tha ajo.

Për Artdashësit e muzikës klasike përgjatë këtij edicioni u programuan 10 koncerte me pjesëmarrjen e 58 instrumentistëve dhe koristëve nga Italia, Greqia, Gjermania, Austria, Sllovenia dhe Shqipëria.

LEXONI GJITHASHTU:

• Mbyllet festivali i folkut në Tiranë, Ukraina rrëmben çmimin e parë