Mbërrin ndihma e parë evropiane për Italinë dhe Spanjën

Dy ekipe mjekësh dhe infermierësh nga Rumania dhe Novergjia dhe 3000 litra dizinfektues nga Austria, janë ndihmat e para për Italinë që vijnë nëpërmjet Mekanizmit Evropian të Mbrojtjes Civile, që prej thirrjes për ndihmë që vendi pati lëshuar kohë më parë që nga shpërthimi i pandemisë. Lajmin e bëri të ditur vetë Komisioneri për menaxhimin e krizave, Janez Lenarçiç.

Janez Lenarçiç, Komisioneri evropian për menaxhimin e krizave:

“Në këto kohë sfiduese, kur e gjithë bota po kacafytet me coronavirusin e ri, jam posaçërisht i kënaqur që sot unë mund të njoftoj për një ekip doktorësh dhe infermierësh evropianë nga Rumania, dhe një tjetër nga Norvegjia, që do të zhvendosen në Itali. Të gjithë e dimë që prej kohësh Italia është goditur veçanërisht rëndë nga ky virus. Kujtojmë gjithashtu që në nisje pati një përgjigje të papërshtatshme ndaj kërkesës së Italisë për ndihmë nga vende të tjera anëtare. Por gjërat kanë ndryshuar tani dhe e vërteta është se Italia nuk është vetëm. E vërteta është që Evropa qëndron në solidaritet me të. “

Dy ekipet mjekësore, për të cilët në deklaratat për shtyp nuk bëhet i ditur numri, do të punojnë në Bergamo dhe në Milano, dy qytetet italiane më të prekura nga Covid-19. Ndërkohë, Komisioneri kujtoi që Italisë iu dha dje dhe ndihma me pajisje mjekësore që Kina solli për BE-në, si dhe vende të ndryshme anëtare kanë ndimuar nëpërmjet mardhënieve dy-palëshe duke ofruar pajisje mjekësore apo duke shtruar në spitalet e tyre persona të prekur nga Italia. Komisioneri njoftoi gjithashtu se situata në Spanjë po përkeqësohet më shumë, dhe se dhe atje do të dërgohet me urgjencë një paketë ndihmash që i ka mbërritur BE-së nga Tajvani.

Ernest Bunguri