Gazetarja e VOA-s, Menada Zaimi, është shprehur se një propozim i SHBA për zgjidhjen e konflitit në Gaza dhe krijimin e një shteti palestinez, ka gjetur mbështetjen edhe të vendeve arabe.

Komentet ajo i bëri në emisionin “Now me Erla Mëhillin” në Euronews Albania, ku tha se ky propozim parashikon ngritjen e një autoriteti palestinez, i cili do të ndihmohet edhe nga vendet arabe, gjë që sipas tij mund të çojë në përmirësimin e marrëdhënieve mes Arabisë Saudite dhe Izraelit.

Zaimi tha gjithashtu se sulmi i fundit i Izraelit në Rafah, ku u vranë 45 civilë, është dënuar ashpër nga autoritetet në SHBA, të cilat e kanë quajtur një ngjarje tragjike.

“Në një reagim të fundit, zëdhënësi i DASH, Mattheë Miller, tha se Uashingtoni i është drejtuar qeverisë së Izraelit për të shprehur shqetësimin për sulmin e së dielës së Rafah. Uashingtoni tha se do të vëzhgojë nga afër hetimet për sulmin. Ky ka qenë qëndrimi i Uashingtonit që i ka bërë të qartë autoriteteve izraelite, për mbrojtjen e popullatës civile. Ka reaguar sot edhe nenpresidentja Kamala Harris që e ka cilësuar ngjarjen më shumë sesa tragjike.

Mbledhja e KS të OKB është një mbledhje urgjente që do të përqëndrohet në Rafah, në sulmin ku u vranë 45 persona. Po ashtu ka patur njoftime të fundit nga autoritetet palestinezë që thonë se tanket izraelite kanë bombarduar një tank ku kanë vrarë 21 persona. Uashingtoni e ka bërë të qartë qëndrimin e tij se njohja e një shteti palestinez duhet të bëhet përmes negociatave.

Duhet se një propozim amerikan për zgjidhjen e konfliktit ka gjetur edhe mbështetjen e shumë vendeve arabe. Pra propozimi parashikon ngritjen e një autoriteti palestinez që do të ndihmohet nga vendet arabe, gjë që do të çojë edhe në normalizimin e marrëdhënieve mes Izraelit dhe Arabisë Saudite. Lidhur me atë se çfarë pritet të sjellë e nesërmja pas mbledhjes së KS të OKB, do të jetë e vështirë miratimi i një projekt-rezolute të përbashkët. Kemi parë gjatë gjithë kësaj kohe që ka qenë e vështirë që të arrihet në një kompromis brenda KS të OKB për shkak të vetove që kanë fuqitë e mëdha brenda këtij këshilli”, tha Zaimi.

LEXONI GJITHASHTU:

• Lufta në Gaza| Gjoka: Kërkesa që SHBA i ka drejtuar Izraelit
• Shefi i OKB-së thotë se ‘tmerri’ në Gaza duhet të ndalet