Mbledhje e jashtëzakonshme e Kuvendit, Ruçi thërret seancën më 4 janar për votimin e ministrave të rinj

Sesioni i ri parlamentar ishte përcaktuar të niste më 18 janar, por Kuvendi i Shqipërisë do të mblidhet në seancë të jashtëzakonshme plenare ditën e hënë më 4 janar. 

Lëvizjet në kabinetin ministror në ditët e fundit të 2020-ës kanë bërë që kryetari i Kuvendit të thërrasë një seancë të jashtëzakonshme për të votuar ministrat e rinj, Olta Xhaçka në postin e ministres së Jashtme dhe Niko Peleshit në krye të Ministrisë sq Mbrojtjes.

Në rendin e ditës për këtë seancë të caktuar pasditen e 4 janarit, nuk është parashikuar asgjë tjetër përveç votimit për ministrat.

Në një intervistë gazetari i Euronews Albania, Ardit Hoxha tregoi se ky vendim vjen pasi Ruçit i ka ardhur një kërkesë formale nga kryeministri Rama për zhvillimin e seancës parlamentare para datës së përcaktuar.

Sipas tij kjo seancë shënon edhe fillimin e një sezoni të ri politik pas festave të fundvitit dhe duke marrë parasysh se jemi në një vit zgjedhjes aktiviteti politik do të jetë edhe më i ngjeshur.