Mbreti Charles për krizën politike SHBA-Britani: Të dyja vendet e kanë gjetur gjithmonë mënyrën për t’u bashkuar

Mbreti Charles dhe Mbretëresha Camilla kanë mbërritur në SHBA për një vizite shtetërore katër-ditore, e para që nga vizita e Mbretëreshës Elizabeth II në vitin 2007.

Ata mbërritën në bazën ajrore ushtarake Andrews në Maryland përpara se të priteshin në Shtëpinë e Bardhë nga Presidenti Donald Trump dhe Zonja e Parë Melania Trump.

Mbreti tha se pavarësisht mosmarrëveshjeve aktuale midis SHBA-së dhe Mbretërisë së Bashkuar, “herë e përsëritur, dy vendet tona kanë gjetur gjithmonë mënyra për t’u bashkuar”.

Gjatë fjalimit të tij, ai tha se në kohë sfidash të mëdha ndërkombëtare, është më e nevojshme se kurrë të qëndrojmë së bashku për të mbrojtur vlerat demokratike.

Fjalimi i tij drejtuar Kongresit bëri thirrje për “pajtim dhe ripërtëritje” të partneritetit SHBA-Britani.

Mbreti u tregoi ligjvënësve amerikanë se aleanca transatlantike është ndërtuar mbi një “bujari shpirti dhe një detyrë për të nxitur dhembshurinë, për të promovuar paqen, për të thelluar mirëkuptimin e ndërsjellë dhe për të vlerësuar njerëzit e të gjitha besimeve dhe asnjë besimi”.

Të hënën, me të mbërritur në bazën ajrore në Maryland, çifti mbretëror u prit në pistë nga shefja e protokollit të SHBA-së Monica Crowley dhe ambasadori britanik në SHBA, Sir Christian Turner, ndër personalitete të tjera.

Vizita shtetërore, e kryer në emër të qeverisë së Mbretërisë së Bashkuar, është një përpjekje e fuqisë së butë për të forcuar marrëdhëniet, në një vit në të cilin SHBA-të po shënojnë 250-vjetorin e pavarësisë.

Midis figurave politike ishin ish-kryetarja e Dhomës së Përfaqësuesve, Nancy Pelosi, senatori Ted Cruz dhe Sekretarja e Jashtme e Mbretërisë së Bashkuar, Yvette Cooper.

Ka pasur thirrje që Mbreti dhe Mbretëresha të takohen me të mbijetuarit e abuzuesit seksual Jeffrey Epstein. Por kjo nuk ka ndodhur për shkak të shqetësimeve për rrezikimin e proceseve ligjore.

Të martën, pas një pritjeje ceremoniale ushtarake në Shtëpinë e Bardhë, Mbreti do të mbajë fjalimin e tij para të dyja dhomave të Kongresit Amerikan, monarku i parë që nga Elizabeth II në vitin 1991 që mban një fjalim të tillë.

Kjo vjen pas një kohe të vështirë për marrëdhëniet SHBA dhe Mbretërisë së Bashkuar, me Presidentin Trump që kritikoi Kryeministrin e Mbretërisë së Bashkuar, Sir Keir Starmer, për shkak të ngurrimit të Mbretërisë së Bashkuar për t’u përfshirë në konfliktin në Iran.

Do të ketë edhe një fjalim nga Presidenti Trump në një darkë shtetërore në Shtëpinë e Bardhë, në një aktivitet që do të mbledhë politikanë dhe personazhe të famshëm nga SHBA-ja dhe Mbretëria e Bashkuar.