Mbyllja e procesit të votimit, reagon Ilir Meta: Monizmi mori goditje

Kryetari i Partisë së Lirisë, Ilir Meta ka reaguar në lidhje me mbylljen e procesit të votimit për zgjedhjet lokale.

Përmes një postimi në facebook Meta falenderon të gjithë qytetarët që morën pjesë në zgjedhje.

Meta theksoi se monizmi ka marrë ditën e sotme një goditje shumë të fortë. Ai shtoi se fokusi tani është për numrimin e rregullt të çdo vote.

“Shpreh mirënjohjen time të thellë për të gjithë qytetarët që morën pjesë në zgjedhje duke përbuzur presionet e të gjitha llojeve të bëra nga pushteti.

Shpreh respektin më të madh për qytetarët votues, që sfiduan deformimet shumë të rënda dhe të qëllimshme të standardeve të zgjedhjeve nga qeveria dhe KQZ.

Shpreh mbështetjen dhe vlerësimin më të lartë për të gjithë anëtarët e komisioneve dhe vëzhguesit e opozitës, që megjithëse në kushtet më të vështira, kryen detyrën me përkushtim dhe vendosmëri në shërbim të votës së çdo qytetari.

Në këtë moment që procesi i votimit ka përfunduar, misioni ynë vazhdon me më shumë përkushtim se më parë për numërimin edhe të votës më të fundit.

Sot monizmi ka marrë një goditje shumë të fortë falë qytetarëve që e duan lirinë.

Të vazhdojmë pa u ndalur në këtë rrugë të hapur me kaq sakrifica për ta çuar deri në fund misionin tonë për votën e lirë dhe mbrojtjen e pluralizimit politik dhe demokracisë”, shkruan Meta.