Mbytja e jahtit në Sicili, gjendet trupi i vajzës së miliarderit britanik

Ekipet italiane të shpëtimit kanë gjetur trupin e Hannah Lynch, personit të fundit të zhdukur nga jahti që u mbyt të hënën pranë Palermos, vajzës së milionerit britanik Mike Lynch, i cili gjithashtu humbi jetën, raporton Ansa.

Trupi i Mike Lynch u gjet nga rrënojat e jahtit të enjten, dhe trupat e katër viktimave të tjera u gjetën të mërkurën.

Jahti me flamur britanik, 56 metra i gjatë dhe me 22 persona – 12 pasagjerë dhe 10 anëtarë të ekuipazhit – u përmbys dhe u mbyt brenda pak minutash nga një stuhi të hënën.

Gjithsej 15 persona mbijetuan, duke përfshirë një fëmijë një vjeçar dhe nënën e Hanës, Angela Bacares.

Kryetari i bankës Morgan Stanley International, Jonathan Bloomer, gruaja e tij Judy Bloomer, avokati i Clifford Chance, Chris Morvillo, gruaja e tij Neda Morvillo dhe kuzhinieri i anijes Recaldo Thomas vdiqën të gjithë në aksident.

Vendimi nëse do të ngrihet jahti i mbytur nga shtrati i detit “nuk është në rendin e ditës”, por do të jetë në të ardhmen, tha një zëdhënës i rojes bregdetare italiane.

Anija ishte “praktikisht e paprekur” në shtratin e detit, sipas zhytësve në ekipin e kërkim-shpëtimit.