“Më kërkuan 1 mijë euro”- Si u realizua aksioni i SPAK ndaj punonjësve të IMT-së

Operacioni i zhvilluar ditën e mërkurë nga SPAK, ku në pranga përfundoi një punonjës i IMT-së së bashkisë Tiranë, mësohet se ka qenë i simuluar.

Katër punonjës të IMT kanë konstatuar një tendë brenda oborrit të një banese në Kombinat, që më pas rezultoi që ishte lokal.

Punonjësit e IMT i kanë kërkuar pronarit të lokalit të heqë tendën. Njëri prej punonjësve është kthyer sërish brenda banesës pas pak minutash dhe i ka kërkuar pronarit 1000€ në këmbim që të mos i hiqte tendën e lokalit në Kombinat.

Pronari i objektit kallëzoi në polici ngjarjen, duke thënë se i kanë kërkuar ryshfet për të mos hequr tendën.

Policia e referoi çështjen në prokurori dhe më pas SPAK autorizoi përgjimin ambiental. Shuma e parave me numër serie u vendos në dispozicion nga ana e policisë, në mënyrë që pronari t’ia jepte punonjësve të IMT.

Paratë u vendosën në dispozicion në një zarf dhe u tërhoqën nga njëri prej punonjësve. Tre të tjerët e prisnin në një lokal ngjitur me objektin.

Policia organizoi operacionin, ku brenda në lokal ishin të dyshuarit. Tre prej tyre u ndaluan, ku njëri u vendos në pranga konkretisht Gerald Fuçia, pasi vetëm për të u gjet prova në momentin që u vëzhguan kamerat dhe u panë përgjimet ambientale.

Ndërsa në kërkim u shpall Klajdi Zhilla. Ky i fundit mori shumën prej 1000€, ku pasi konstatoi prezencën e policisë e fshehu shumën në banakun e lokalit. Policia ushtroi kontrolle dhe pasi vëzhgoi kamerat e sigurisë, gjeti paratë.

Hetimet po ndiqen nga prokurori Sotir Kllapi, teksa GJKKO pritet të caktojë datën për zhvillimin e seancës për masën e sigurisë.

Të dyshuarit akuzohen për veprën penale “korrupsion pasiv”.