Sekretari amerikan i Shtetit deklaroi se është “absolutisht jetike” t’i dërgohen më shumë armatime Ukrainës. Antony Blinken e bëri deklaratën gjatë një vizite në një fabrikë armësh në Versajë, me ministrin francez të Mbrojtjes.
Zyrtarët nënvizuan se Ukraina mbetet në dizavantazh krahasuar me Rusinë në fushën e betejës dhe pranuan raportimet e trupave ukrainase në vijat e frontit se po u mbarojnë municionet. Vetëm muajin e kaluar, forcat ukrainase u tërhoqën nga qyteti lindor i Avdivkës.
Edhe kryeministri çek Petr Fiala deklaroi gjatë një vizite në Lituani se rreth 20 vende i janë bashkuar nismës çeke për dërgimin e municioneve në mbështetje të Ukrainës.
Ndërkohë, presidenti rus Vladimir Putin njoftoi se mbi 3.2 milionë persona në rajonet ukrainase të kontrolluara nga Moska kanë marrë pasaporta ruse. Kreu i Kremlinit u bëri thirrje autoriteteve të sigurohen që personat që kërkojnë nënshtetësi ruse të respektojnë vlerat e vendit.
Në kuadër të ofensivës, trupat ruse kryen së fundmi një sulm me raketa në qytetin Dnipro, duke plagosur 13 persona.
Tetë nga të lënduarit u shtruan në spital dhe janë në gjendje të qëndrueshme, ndërsa të tjerët u mjekuan në vendngjarje.
LEXONI GJITHASHTU:
- Stoltenberg propozon ndihmë ushtarake për Ukrainën me vlerë 100 miliardë euro
- Zelensky nënshkruan ligjin për uljen e moshës së rekrutimit në Ukrainë
