“Me vullnetin e Zotit, Erdogan do fitojë” Qytetarët të ndarë për balotazhin në Turqi

Mbështetësit e qeverisë dhe opozitës në Turqi nuk janë të lumtur me rezultatin e zgjedhjeve. Pas votimeve të së dielës, gjithçka do të vendoset më 28 maj, kur do të mbahet raundi i dytë i zgjedhjeve presidenciale.

Reagimet e qytetarëve janë ndarë sa i takon balotazhit, disa thonë se ato duhet të ishin fituar nga opozita që në raundin e parë, ndërsa të tjerë besojnë në fitoren bindëse të Erdogan në raundin e dytë.

“Mendoj se ishte diçka e pritshme, sepse ky vend është një vend që e di se çfarë kërkon. Ky komb ka dy këndvështrime të kundërta. Ne po jetojmë në një vend demokratik, me zgjedhje ku kushdo ishte i lirë të shprehte vullnetin e tij. Thjesht, ishte diçka e pritshme”, tha një qytetar.

Ndërkohë një tjetër u shpreh: “Pavarësisht gjithë zhvillimeve negative në vend, ne sërish humbëm për shkak se votuam personin e gabuar. Duhet të kishim fituar bindshëm, por i humbëm këto zgjedhje”.

Mbështetësit e Erdogan shprehen të zhgënjyer që zgjedhjet shkuan në raundin e dytë dhe thanë se fitorja duhet të ishte siguruar që në raundin e parë.

“Personalisht nuk doja që këto zgjedhje të shkonin në balotazh. Duhet të kishim fituar mbi 50% të votave. Nuk duhet të përjetojmë 14 ditë të tjera stres. Me vullnetin e Zotit, Erdogan do ta fitojë raundin e dytë në mënyrë bindëse”, tha një mbështetës i Erdogan.

Balotazhi do të mbahet më 28 maj. Përballë janë presidenti në detyrë Recep Tayyip Erdogan dhe lideri i opozitës, Kemal Kiliçdaroglu. Të dielën, i pari siguroi 49.5% të votave, ndërsa i dyti 44.8.

LEXONI GJITHASHTU:

• Turqi, Erdogan dhe Kiliçdaroglu do ‘lajnë hesapet’ në raundin e dytë më 28 maj
• Momenti kur Erdogan pret për të votuar, reagimi i qytetarëve kur e shohin pas tyre
• Shpallet rezultati final i raundit të parë të zgjedhjeve në Turqi