Media afrikane raporton rastin e dhunimit të 22-vjeçares nga Kenia

Media afrikane “Africanews” ka pasqyruar rastin e dhunimit të 22-vjeçares  keniane Joy Aoko, e cila që prej tre muajsh ndodhet në spitalin e Traumës në gjendje kome.

Media afrikane në artikull teksa ka raportuar për protestën e qytetarëve dhe aktivistëve të shoqërisë civile, para Drejtorisë së Policisë në Tiranë, ka cituar dhe lajmin e Euronews Albania nga gazetarja Ortensa Budlla.

Aktivistët kërkuan drejtësi dhe kurim jashtë vendit për të renë ndërsa akuzuan policinë se nuk ka bërë aq sa duhet në lidhje me ngjarjen.

“A funksionon drejtësia vetëm për njerëzit e këqij? Mbulimi i këtij krimi përbën një precedent ndaj të pambrojturve në të gjithë vendin. Kërkojmë një hetim më të fortë dhe kërkojmë që autorët të dalin para drejtësisë.  Kërkojmë që institucionet të paguajnë faturat e trajtimit të saj jashtë vendit”- tha aktivistja Xheni Karaj .

Pjesë e protestës ishte edhe avokati Idajet Beqiri, i cili u shpreh i revoltuar për fshehjen e ngjarjes nga policia, duke shtuar se fshehja e rastit është krim më vete.

“E konsideroj një turp të madh për institucionet shqiptare. Policia e shtetit fshehu krimin. A është kjo e gjitha për racizëm apo ka arsye të tjera? Mbulimi i një krimi është një krim në vetvete.”- tha Beqiri.

22-vjeçarja nga Kenia punonte në një nga kazinotë e kryeqytetit dhe mesnatën e 13 gushtit Joy Aoko u gjet pa ndjenja poshtë pallatit ku banonte.

Kanë qenë shoqet e të resë që e kanë identifikuar atë në gjendje kritike për jetën.

Theksojmë se vajza ka qëndruar për disa orë në gjendje të rëndë në oborrin e një hoteli. Sakaq e ëma është njoftuar 2 ditë më vonë për ngjarjen e rëndë.

Kjo e fundit në një intervistë  për Euronews Albania theksoi se vajza po ndiqej prej një kohe të gjatë nga një shofer kazinoje dhe se ndihej e kërcënuar dhe e pasigurt.

“Ajo më tha se një shofer po e ndiqte dhe se donte të kishte një marrëdhënie romantike me të, por ajo nuk e donte atë. Ajo më tha se ishte kërcënuar. Unë takova shoferin dhe fillova një bisedë normale me të dhe e pyeta pse nuk merr jo për përgjigje nga vajza ime.”-shpjegoi ajo.

Ndërkohë Prokuroria ka nisur hetimet për ngjarjen por ende nuk ka një përgjigje se çfarë ka ndodhur realisht.

LEXONI GJITHASHTU: 

• Misteri i telefonatës së fundit, kush e dhunoi 22-vjeçaren keniane
• ‘Xhoi e urrente e varfërinë’, rrëfimi i nënës së 22-vjeçares keniane të dhunuar