Medvedev: Shkëmbimi i të burgosurve nuk zgjidh asgjë nëse ska një shtet palestinez

Zëvendëskryetari i Këshillit të Sigurisë së Rusisë, Dmitry Medvedev, tha të hënën se, ndërsa lirimi i pengjeve izraelite dhe të burgosurve palestinezë është një hap pozitiv, ai nuk do të sjellë paqe të qëndrueshme nëse nuk krijohet një shtet i plotë palestinez në përputhje me rezolutat e OKB-së.

Hamasi liroi 20 pengje izraelite të gjallë të hënën në mëngjes në këmbim të gati 2,000 të burgosurve palestinezë sipas fazës së parë të marrëveshjes së armëpushimit në Gaza. Grupi palestinez tha se do të transferonte gjithashtu eshtrat e katër robërve izraelitë të hënën.

“Lirimi i pengjeve izraelite dhe të burgosurve palestinezë është një gjë e mirë, sigurisht, por nuk do të zgjidhë asgjë.Derisa të krijohet një shtet i plotë palestinez në përputhje me rezolutat e njohura të OKB-së, asgjë nuk do të ndryshojë. Lufta do të vazhdojë. Të gjithë e kuptojnë këtë”, tha Medvedev në kanalin e tij në Telegram.

Javën e kaluar, Trump njoftoi se Izraeli dhe Hamasi kishin rënë dakord për fazën e parë të një plani që ai paraqiti më 29 shtator për të sjellë një armëpushim në Gaza, për të liruar të gjithë robërit izraelitë në këmbim të të burgosurve palestinezë dhe për një tërheqje graduale të forcave izraelite nga i gjithë Rripi i Gazës. Faza e parë e marrëveshjes hyri në fuqi të premten.

Ndërkohë, faza e dytë e planit kërkon krijimin e një mekanizmi të ri qeverisës në Gaza pa pjesëmarrjen e Hamasit, formimin e një force shumëkombëshe dhe çarmatimin e Hamasit.

LEXONI GJITHASHTU:

• Shefi i NATO-s “tallet” me nëndetëset ruse, përgjigjet Kremlini
• NATO nis stërvitjen bërthamore në Holandë, Rutte: Sinjal i qartë për çdo kundërshtar