Kryeministrja italiane Giorgia Meloni tha sot se është dakord me deklaratën e miliarderit Elon Musk se financuesi dhe filantropisti amerikan George Soros ndërhyn në punët e brendshme të vendeve të tjera.
“Problemi është kur këta njerëz përdorin burime për të financuar partitë dhe shoqatat në mbarë botën për të ndikuar në politikë, gjë që nuk mendoj se e bën Musk, ndryshe nga Soros”, tha Meloni në një konferencë për shtyp.
Ajo tha se pajtohet me vlerësimin e Musk se Soros ndërhyn në politikën e brendshme të vendeve të tjera dhe se pronari i Tesla nuk përbën kërcënim për demokracinë për shkak të deklaratave të tij. Meloni ka theksuar se ajo nuk i ka marrë paratë Musk-ut, por se “të tjerët” ia kanë marrë Sorosit, transmeton Ansa.
Duke komentuar mbështetjen e Musk për Alternativën për Gjermaninë (AfD) të ekstremit të djathtë dhe kritikat ndaj kancelarit gjerman në largim Olaf Scholz, Meloni kujtoi ndërhyrjen e supozuar gjermane në politikën italiane.
“Do të doja të kujtoja ndërhyrjen e palës gjermane në zgjedhjet e përgjithshme italiane”, tha ajo, duke iu referuar shqetësimit të Berlinit për pikëpamjet e saj të krahut të djathtë.
Ajo gjithashtu vuri në dyshim mosbesimin ndaj Musk, duke thënë se ishte për shkak se ai kishte besime të krahut të djathtë.
LEXONI GJITHASHTU:
- Meloni në vizitë të papritur në rezidencën e Trumpit
- Meloni refuzon largimin e simboleve fashiste nga logoja e partisë
