Meloni larg vëmendjes, fituesja e zgjedhjeve punon në heshtje për programin

Giorgia Meloni ka zgjedhur një profil të ulët pas triumfit të partisë së saj në zgjedhjet e së dielës, me 26 për qind të votave.

Por, në cilësinë e “mendimtares”, siç e quajnë bashkëpunëtorët, ajo po punon për programin e qeverisë që pret të udhëheqë.

Në ditën e ndarë mes familjes dhe punës, Meloni ka zhvilluar edhe një bisedë telefonike me kryeministrin në detyrë Mario Draghi.

Lajmin e bëjnë të ditur mediat italiane, të cilat citojnë burime parlamentare, pasi nga zyrat e dy bashkëbiseduesve nuk ka pasur asnjë konfirmim.

Sipas burimeve, bisedimet kanë qenë të ngrohta dhe kanë pasur në fokus çështje të karakterit ekonomik, duke filluar me përgatitjen e manovrës së ardhshme financiare nga qeveria e re, që do të zëvendësojë të vjetrën.

Gjithashtu, një tjetër pikë ku mazhoranca e re po punon është mundësia për ndryshimin e Kushtetutës, e propozuar nga krerët e grupeve parlamentare të Vëllezërve të Italisë.

Ndërkohë, reagimet në kancelaritë evropiane lidhur me fitoren e Melonit kanë qenë të moderuara. Në Gjermani, zëdhënësi i Olaf Scholz, që kishte dalë hapur pro PD-së, bëri apel që Italia të mbetet një vend mik i BE-së.

Një thirrje e ngjashme erdhi edhe nga presidenti francez Emmanuel Macron, që ka theksuar se “duhet respektuar zgjedhja demokratike” e italianëve.

Më pozitive në reagim ishte kryeministrja e re britanike, Liz Truss. “Urime Giorgia Melonit për suksesin e partisë së saj në zgjedhjet italiane”, ka shkruar Truss në Twitter.

“Nga mbështetja për Ukrainën tek përballja me sfidat ekonomike globale, Mbretëria e Bashkuar dhe Italia janë aleatë të ngushtë”, është shprehur ajo.

Ndërsa sekretari amerikan i Shtetit, Antony Blinken ka deklaruar se mezi pret të punojë me Italinë për sfidat me të cilat përballet bota sot.

LEXONI GJITHASHTU:

• Fitorja e Melonit, Tritan Shehu: Nuk shoh diferencë mes gruas dhe burrit në politikë
• Fitorja e Melonit, senatori italian flet ekskluzivisht në ‘Now’