Menaxhimi i Butrintit, Berisha: Akt korruptiv, parashikohet shpërbërja e parkut

Kryetari i Partisë Demokratike, Sali Berisha e ka cilësuar projektligjin për menaxhimin e Parkut Kombëtar të Butrintit nga një fondacion privat, si një akt korruptiv të pashembullt.

Në një deklaratë për mediat nga ambientet jashtë Kuvendit, Berisha u shpreh se nuk do lejojë kryeministrin Edi Rama që ta trajtojë Parkun e Butrintit si plaçkë.

Ndër të tjera, Berisha tha se në planin e menaxhimin është parashikuar edhe shpërbërja  e parkut.

“Mbrojtja e Butrintit është imperativ për çdo shqiptar. E garantoj Edi Ramën se nuk do mundet të sillet e Butrintitn sikur të ishte plaçkë, është pronë e shqiptarëve, një nga pasuritë më të çmuara kombëtare. Ata që kanë parashikuar shpërbërjen e parkut dhe kanë përdorur një plan menaxhimi për këtë qëllim, kanë parashtruar programin e një akti korruptiv të pashembullt”, deklaroi ish-kryeministri.

Parku Kombëtar i Butrintit pritet të administrohet nga një fondacion që do të krijohet në bashkëpunim të qeverisë shqiptare me Fondacionin Shqiptaro-Amerikan për Zhvillim.

LEXONI GJITHASHTU

• Shoqëria civile kundër projektligjit për ‘Butrintin’: Konflikt i hapur interesi

• Në Butrint s’do ndërtohet asnjë hotel apo objekt tregtar, thotë kreu i AADF-së