Menjëherë pasi u betua si president, Putin vizitë në Kinë me ftesë të Xi

Presidenti rus, Vladimir Putin, do të vizitojë Kinën këtë javë me ftesë të presidentit kinez Xi Jinping, njoftoi të martën Ministria e Jashtme kineze.

Putin do të jetë në Pekin nga e enjtja deri të premten, tha zëdhënësja e Ministrisë së Jashtme kineze.

Kremlini konfirmoi në një deklaratë se Putini po shkon në Kinë, duke thënë se kjo është vizita e tij e parë jashtë vendit që kur u betua dhe filloi mandatin e tij të pestë presidencial.

Ditë përpara se Rusia të niste pushtimin e saj në Ukrainë në shkurt 2022, Pekini dhe Moska deklaruan një partneritet “të pandalshëm” dhe që atëherë kanë rritur tregtinë në një nivel rekord.

Rusia është mbështetur tek Kina për ndihmën e rëndësishme ekonomike që kur Perëndimi vendosi sanksione ndaj Moskës për agresionin e saj në Ukrainën fqinje.

Deri atëherë, Kina ka përfituar nga importet e lira ruse të energjisë dhe aksesi në burime të mëdha natyrore, duke përfshirë furnizimet e qëndrueshme të gazit përmes tubacionit Power of Siberia.

Megjithatë, partneriteti i tyre i ngushtë ekonomik është vënë nën vëzhgimin perëndimor, me Shtetet e Bashkuara që kërcënojnë të sanksionojnë bankat dhe kompanitë e huaja që bashkëpunojnë me Moskën.