Merz përgëzon marrëveshjen tregtare mes SHBA-së dhe Britanisë

Udhëheqësi i ri i Gjermanisë, Friedrich Merz, ka vlerësuar marrëveshjen tregtare të arritur këtë javë midis Britanisë dhe SHBA-së si një hap pozitiv, por i ka kujtuar presidentit amerikan Donald Trump se një pakt i ngjashëm është i pamundur të negociohet me vendet individuale të Bashkimit Evropian.

Në një konferencë për shtyp me Presidentin e Këshillit Evropian, António Costa, gjatë një turneu të shkurtër në Bruksel, Merz tha: “E përgëzova presidentin e SHBA-së për marrëveshjen që ka arritur me Mbretërinë e Bashkuar dje. Kjo është një rrugë e mirë përpara.”

Merz gjithashtu njoftoi se kishte biseduar me Trumpin përmes telefonit të enjten vonë. Marrëveshja e nënshkruar midis Londrës dhe Uashingtonit përfshin heqjen e disa tarifave të vendosura nga Trump dhe zgjerimin e aksesit reciprok në treg. Trump e cilësoi marrëveshjen “historike”, duke theksuar se do të sjellë Mbretërinë e Bashkuar në “harmonizim të sigurisë ekonomike” me SHBA-në.

Megjithatë, Merz, i cili u betua si kancelar i ri i Gjermanisë këtë javë, theksoi se një marrëveshje e tillë nuk mund të arrihet me shtetet anëtare individuale të BE-së. “Nuk është e mundur ta bëjmë këtë me shtetet anëtare individuale të BE-së, sepse ne negociojmë tregtinë vetëm së bashku,” theksoi ai.

Ai gjithashtu shtoi: “Përshtypja ime është se ai Trump e pranoi këtë, kështu që tani e di se mund të negociojë me ne vetëm së bashku.”

LEXONI GJITHASHTU:

• Trump heq tarifat për Britaninë, ul në 80% ato për Kinën: Marrëveshje edhe me BE-në
• Ukraina zbulon një rrjet hungarez spiunazhi, arreston dy të dyshuar