Mesazhi i Presidentes së KE pas rezultateve të para: Të mbrojmë Europën

Presidentja e Komisionit Europian, Ursula Von Der Leyen, foli pas rezultatit të zgjedhjeve për Parlamentin Europian, ku Partitë Popullore Europiane të qendrës së djathtë kanë fituar shumicën e vendeve.

Der Leyen tha se rezultatet e këtyre zgjedhjeve vijnë me një përgjegjësi të lartë për partitë në qendër, duke parë rritjen e partive të ekstremit të djathtë.

Ajo tha po ashtu se disa forca në botë po përpiqen të dëmtojnë unionin, por premtoi se nuk do të lejojnë që të ndodhë diçka e tillë.

“Rezultatet vijnë me një përgjegjësi të lartë për partitë në qendër. Të gjithë kemi interes në stabilitet dhe qëndrueshmëri. Të gjithë duam një Europë të fortë. Kam punuar për të ndërtuar një maxhorancë efektive proeuropiane. Ne kemi punuar fortë gjatë 5 viteve të fundit. Unë gjithmonë kam thënë që të krijojmë një mazhorancë të gjerë për një Europë të fortë. Të vijojmë në këtë drejtim me ata që janë proeuropianë e proukrainas. Forca nga brenda e jashtë po përpiqen të dobësojnë Europën, por ne kurrë nuk do të lejojmë të ndodhë diçka e tillë. Rroftë Europa”, tha Der Leyen.