Mesazhi i State of the Union, Biden: Gati të përballemi me Kinën

I pritur me ovacione, Joe Biden u shfaq i zjarrtë dhe herë pas here me tone luftarake në fjalimin e tij të State of the Union. Në Dhomën tashmë të kontrolluar nga republikanët, përveç se u bëri thirrje atyre për të punuar së bashku, presidenti amerikan rikonfirmoi mbështetjen për Ukrainën.

“Ne qëndruam kundër agresionit të Putin, ne u rreshtuam pranë popullit ukrainas. Dhe sonte këtu me ne është edhe ambasadorja ukrainase në SHBA, që nuk përfaqëson vetëm vendin e saj, por edhe kurajon e qytetarëve. Zonja ambasadore, Shtetet e Bashkuara mbështesin vendin tuaj. Ne do të qëndrojmë krah jush përsa kohë të jetë e nevojshme,” – tha Biden.

Një mesazh të qartë, shefi i Shtëpisë së Bardhë i dërgoi edhe Kinës, duke u shprehu i gatshëm si për të bashkëpunuar, edhe për t’u përballur me të.

“Unë jam i gatshëm të bashkëpunoj me Kinën për të avancuar interesat e Amerikës në të mirë të botës. Por mos bëni gabime, nëse Kina kërcënon sovranitetin tonë, ne do ta mbrojmë vendin, gjë që e kemi bërë deri tani,” – u shpreh Biden.

Gjatë eventit, presidenti Biden vlerësoi gjithashtu figura jashtë politikës, si kantautorin irlandez Bono, të grupit U2, për përpjekjet e tij për të luftuar HIV dhe AIDS në Afrikë dhe 26-vjeçarin Brandon Tsay, që çarmatosi atentatorin e sulmit në Monterej Park, ku humbën jetën 11 persona.

LEXONI GJITHASHTU:

• Tërmeti tragjik në Turqi, Biden: Jam i pikëlluar, kam nisur ekipin tim për ndihmë
• Mulaj: Për çfarë po nxiton Vuçiç dhe letra eBiden që po ndryshon ujërat në Ballkan