‘Messi nuk do të largohet’, presidenti i Barcelonës deklaron se argjentinasi do të qëndrojë

Leo Messi do ta përfundojë karrierën tek Barcelona, kjo është deklarata e presidentit të klubit katalanas Josep Maria Bartomeu, pas zërave të fundit që flinin për një divorc të argjentinasit me 26 herë kampionët e Spanjës.

Pak ditë më parë, mediat spanjolle publikuan lajmin se kapiteni kishte ndërprerë negociatat për rinovimin e kontratës, çka mund të sillte largimin në fund të edicionit të ardhshëm, por pas takimit mes Vilareal dhe Barcelonës, vetë presidenti Bartomeu hodhi poshtë çdo mundësi që 33-vjeçari të largohet nga Camp Nou.

“Messi ka thënë se ai do t’i japë fund karrierës si futbollist tek Barça. Kjo është dëshira e tij dhe ne do ta kemi për shumë vite mes nesh”, tha Bartomeu

Dashuria mes Mesit dhe Barcelonës duket se do të vazhdojë, me argjentinasin që ka ende rekorde për të thyer.

33-vjeçari deri më tani ka dhënë kontributin në 996 gola tek Barça dhe është shumë pranë arritjes së numrit 1000, çka do të ishte diçka e jashtëzakonshme. Messi ka shënuar 700 gola, si dhe ka dhënë 296 asiste në 863 prezenca.