Ndryshimi i Kodit Zgjedhor, Meta apel Kuvendit: Mos votoni ”pro” pushtetit të partisë mbi interesin kombëtar

Presidenti Ilir Meta apeloi të hënën që Kuvendi të mos votojë ndryshimet e Kodit Zgjedhor pasi në këtë mënyrë “prishet pabesisht marrëveshja e 5 qershorit” dhe Shqipërisë “i mbyllet dera integrimit” drejt Bashkimit Evropian.

Meta e bëri këtë apel gjatë konferencës për shtyp që pati me homologun e tij nga Bosnje e Hercegovina Shefik Xhaferoviç, i cili nisi sot një vizitë dyditore në Shqipëri.

“Uroj që e ashtuquajtura mazhorancë të kthjellohet, po kështu të ashtuquajturit opozitarë në parlament, nëse duan të quhen të tillë, nuk duhet t’u shkojë mendja të mbyllin dyert e integrimit evropian të Shqipërisë, sepse çdokush që do të ngrejë dorën për të prekur 5 qershorin, përveç listave të hapura 100 për qind, ai ngre dorën kundër integrimit evropian të Shqipërisë, ai vendos mbi pusht-pushtetin e partisë mbi një interes kombëtar të të gjithë shqiptarëve, unë dua që kjo të mos ndodhë,” – u shpreh presidenti gjatë konferencës për shtyp.

“Presidenti do t’u publikojë emrat e të gjithë atyre që do të duan ta bëjnë një gjë të tillë, ata që duan ta kthejnë Shqipërinë 30 vjet pas…” – u shpreh Meta duke këmbëngulur se “do të duartrokasë nëse palët do të respektojnë marrëveshjen e 5 qershorit”.

Lexoni gjithashtu:

Ndryshimet në kodin zgjedhor, Gjiknuri: Modeli ynë korrigjon çdo anomali, asnjë parti s’meriton fonde publike nëse nuk merr 1 % të votave

Ruçi bën thirrje për votim unanim të ndryshimeve në kodin zgjedhor: Mazhoranca u tregua dorështrirë