Meta apel qeverisë për ”plan urgjent” testimi masiv të qytetarëve

Presidenti Ilir Meta apeloi sërish të hënën ndaj qeverisë që të mos humbasë kohë por të rrisë masivisht numrin e testimeve të qytetarëve për të gjurmuar më mirë rastet me COVID-19.

Me një postim në Facebook, Meta theksoi se “testimi është mundësia e vetme për të vendosur kontrollin mbi situatën” e pandemisë që ka kapluar vendin.

Për këtë Meta sugjeroi katër hapa të hierarkisë së “testimit të menjëhershëm”:

• Mjekët, infermierët dhe personeli mbështetës […] në vijën e parë të përballjes me COVID-19;
• Arsimtarët, për shkak se testimi dhe gjurmimi pasues i rasteve të tyre lidhet drejtpërdrejt me shëndetin e fëmijëve tanë;
• Të moshuarit e vetmuar;
• Qytetarët me sëmundje bashkëshoqëruese;

“Për të gjitha këto kategori është tepër e nevojshme, sipas rekomandimeve të OBSH-së dhe organizatave të tjera, të nisë menjëherë edhe vaksinimi me vaksinën e gripit stinor,” – thotë Meta.

Presidenti udhëzon që për këtë qëllim të miratohet një “plan urgjent” pasi “pandemia mund të vihet nën kontroll dhe jetët e qytetarëve mund të shpëtohen”.

“Çdo ç’organizim, mosfinancim dhe mosveprim sjell pasoja fatale përditë. Shkenca ka folur. Koha për të vepruar nuk pret më!” – këmbënguli Presidenti.