Meta dekreton dy ministrat e rinj, Xhaçka dhe Peleshi marrin postet

Presidenti Ilir Meta ka dekretuar Olta Xhaçkën si ministre për Europën dhe Punët e Jashtme dhe Niko Peleshin si ministër të Mbrojtjes.

“Presidenti i Republikës, Sh.T.Z Ilir Meta ka dekretuar sot shkarkimin e zotit Edi Rama nga detyra e ministrit për Europën dhe Punët e Jashtme dhe zonjës Olta Xhaçka nga detyra e ministrit të Mbrojtjes.Po sot, Presidenti Met ka dekretuar emërimin e zonjës Olta Xhaçka në detyrën e ministrit për Europën dhe Punët e Jashtme dhe zotit Niko Peleshi në detyrën e ministrit të Mbrojtjes”, thuhet në njoftimin e Presidencës.

Dy ditë më parë i ngarkuari me punët e ministrisë për Evropën dhe punët e Jashtme, Gent Cakaj njoftoi se kishte dhënë dorëheqjen. Kryeministri Edi Rama lajmëroi menjëherë më pas lëvizje në qeveri.

Kujtojmë që javën e dytë të dhjetorit, pas protestave për vrasjen nga policia të 25-vjeçarit Klodian Rasha, dhe dorëheqjes së ministrit të Brendshëm Sandër Lleshaj, Rama lëvizi në këtë detyrë ministrin e Bujqësisë Bledi Çuçi dhe në ish-postin e tij emëroi Milva Ekonomin.

Po kështu, në muajin shtator, pak përpara nisjes së vitit të ri shkollor, u dorëhoq ministrja e Arsimit, Besa Shahini. Në vend të Shahinit u emërua Evis Kushi.

Lexoni gjithashtu:

Ndryshime në qeveri, Ministria e Jashtme i kalon Xhaçkës, rikthehet Niko Peleshi