Meta denoncon përpjekjen për të uzurpuar KLSH-në, apel kreut aktual të mos u bindet urdhrave

Presidenti Ilir Meta mbajti të premten konferencën e përjavshme për shtyp ku fillimisht tregoi për dekretet e firmosura prej tij e më tej ftoi gazetarët për pyetje rreth çështjeve politike.

Meta tha se ka kthyer për rishqyrtim ligjin “për shërbimet e pagesave”, pasi nuk garantonte sigurinë e administrimit të fondeve dhe shmangien e keqpërdorimit për pastrim parash apo financim terrorizmi.

Nga ana tjetër ai tha se kishte dekretuar shtesat në ligjin për sigurimet shoqërore, të cilat vlerësojnë edhe kontributet e dhëna ndër vite të sportistëve për t’u njohur atyre të drejtën për të përfituar pension të posaçëm.

Reflektimi i mazhorancës rreth shqetësimeve të ngritura më parë nga Meta rreth projektligjit për huamarrjen në urgjencë të 650 milionë eurove me emetimin e një eurobondi duket se i ka dhënë dritën jeshile edhe miratimit të këti jligji.

Meta tha se qeveria pranoi se urgjenca lidhej me “presionin e lartë financiar që po kalon vendi pas tërmeteve dhe pandemisë së COVID-19”. Por sidoqoftë Presidenti theksoi se qeveria duhet të ofrojë transparencë për çdo transaksion që do të bëhet për këtë eurobond.

Çështja e kryetarit të Kontrollit të Lartë të Shtetit (KLSH) ishte tjetër temë e nxehtë, për të cilën Meta denoncoi atë që e quajti si përpjekje “për të uzurpuar KLSH-në”.

Meta sqaroi se “nuk do të pranojë shantazhe me ndryshime ligjore me kinse mekanizma shbllokuese”, ku mazhoranca sipas tij “po kërkon të rrëmbejë kontrollin e KLSH-së përmes komandimit të një zëvendëskryetari”.

Të enjten, Presidenti i drejtoi Kuvendit kandidaturën e Arben Shehut për kryetar të KLSH-së, çka ishte propozimi i katërt për këtë post, ku tre propozimet e shkuara: Petraq Milo, Bahri Shaqiri dhe Vitore Tusha janë rrëzuar nga mazhoranca.

Duke paralajmëruar “kapjen e KLSH-së”, Meta tha se i kishte kërkuar kreut aktual të këtij institucioni, Bujar Leskajt, që të mbante postin me përgjegjësi dhe “të mos i bindej asnjë urdhri apo akti që mund të synojë uzurpimin e këtij institucioni përmes emërimeve jokushtetuese”.

“I kam kërkuar zyrtarisht kryetarit të KLSH-së, Bujar Leskajt që të qëndrojë në lartësinë e detyrës, në respekt vetëm të Kushtetutës dhe ligjit, deri në zgjedhjen e Kryetarit të ri në mënyrë vetëm kushtetuese dhe të mos i bindet asnjë urdhri apo akti që mund të synojë uzurpimin e këtij pozicioni mjaft të rëndësishëm kushtetues,” – theksoi Meta teksa ftoi parlamentin ta vlerësojë me objektivitet, jashtë interesit politik, kandidaturën e propozuar së fundmi prej tij.

Lexoni gjithashtu:

Ambasadorja Yuri Kim në zyrën e presidentit. Opozita ende pa vendim për reformën zgjedhore 

Meta kundërshton marrjen borxh me urgjencë të 650 milionë eurove

Meta i dërgon Kuvendit propozimin e katërt për kryetar të Kontrollit të Lartë të Shtetit