Meta do të jetë emërtimi i ri i Facebook, njofton Mark Zuckerberg 

Gjigandi i rrjeteve sociale së shpejti do të ndryshojë emër, duke u kthyer nga Facebook në Meta, sapo deklaroi themeluesi i tij Mark Zuckerberg.

Ndryshimi vjen si pasojë e përpjekjeve për të përfshirë realitetin virtual, pjesë e vizionit për të ardhmen e platformës, të cilës Zuckerberg i është referuar më parë si “metaverse”.

Por skeptikët mendojnë se e gjithë kjo po bëhet për të hequr vëmendjen nga Facebook Papers, dokumentit që zbuloi një prej anëve të errëta të Facebook.

Sipas parashikimeve të Zuckerberg, “Metaverse” do të arrijë një miliard përdorues deri në dekadën e ardhshme. Metaverse, deklaroi ai, do të jetë një vend ku njerëzit do të mund të ndër veprojnë, punojnë e krijojnë produkte të ndryshme, me shpresën se do të ngjasojë me një formë ekosistemi që do të gjenerojë “miliona vende pune”.

Njoftimi vjen gjithashtu në një kohë kur rrjeti social po përjeton një krizë ekzistenciale, në mes të problemeve legjislative dhe një hetimi të hollësishëm nga shumë shtete të botës pas publikimit të Facebook Papers.

Teksa po shpjegonte emërtimin e ri, Zuckerberg tha se emri “Facebook” thjesht nuk i përshkruan më “të gjitha ato që në bëjmë”.

Tashmë, përveç rrjetit të parë social, kompania zotëron edhe Instagramin, Messenger, Quest VR, platformën Horizon VR e shumë të tjera.