Meta i përgjigjet akuzës së Veliajt për ambasadorët

Presidenti, Ilir Meta ka mohuar akuzën e kreut të Bashkisë Tiranë, Erion Veliaj se po bllokon emërimin e ambasadorëve të rinj të Shqipërisë.

Presidenti tha se ka refuzuar të dekretojë emra vetëm në rastet kur propozimet kanë ardhur në kundërshtim me ligjin.

“Të gjitha janë vetëm mashtrime ordinere”, tha Meta duke theksuar se nuk ka asnjë shkresë të Ministrisë së Jashtme për një problem të tillë.

Kreu i Shtetit shtoi se ka bërë disa dekretime për ambasadorë ndërsa nga ana tjetër tha se ka refuzuar të firmosë kur i janë paraqitur kandidatura pa kaluar më parë në komisionet parlamentare.

Kreu i Bashkisë Tiranë, Veliaj është shprehur se gjatë pjesëmarrjes në forume botërore ka marrë ankesa për ambasadorë shqiptarë që qëndrojnë gjatë në detyrë.

“Në forume ndërkombëtare ka nga ata që më pyesin; a ka diçka që nuk shkon në Shqipëri që janë ambasadorët nga 6, 7 apo 8 vjet”, tha Veliaj duke shtuar se ngërçe të tilla nuk e ndihmojnë vendin.

LEXONI GJITHASHTU:

Meta paralajmëron ‘komitet transparence për aferën e inceneratorëve’