Meta i shqetësuar nga rreziku i përmbytjeve, thirrje autoriteteve të marrin masa

Presidenti Ilir Meta i bëri sot thirrje qeverisë dhe autoriteteve vendore të marrin masat për t’i paraprirë situatave të mundshme me përmbytje, veçanërisht në zonën e Shkodrës.

Në një postim në Facebook, Meta tha se në kushtet kur intensiteti i reshjeve të shiut do të vazhdojnë edhe për disa ditë autoritetet duhet të marrin masa urgjente. 

Meta u shpreh se nga hidrocentralet mbi lumin Drin është bërë me dije se “për shkak të intensitetit të reshjeve, priten shkarkime të mëdha nga HEC-et dhe për pasojë parashikohet të ketë përmbytje në zonën e Shkodrës”.

Për këtë Presidenti ka kërkuar:

• informim të popullatës që jeton në zonat e rrezikuara
• garantim të rezervave të mjaftueshme ushqimore për popullatën dhe blegtorinë
• vendosje në gatishmëri të hidrovoreve
• vendosje në gatishmëri të strukturave menaxhuese të rrezikut
• vendosja në gatishmëri të strukturave të kërkim-shpëtimit dhe mjeteve ajrore dhe lundruese
• marrjen e masave për të garantuar qarkullim normal në akset rrugore të zonave të rrezikuara

“Mbrojtja e shëndetit, jetës dhe pronës së çdo qytetari të Republikës së Shqipërisë është një detyrim kushtetues, që duhet përmbushur me përgjegjshmëri maksimale,” – shkroi Meta në Facebook.

Meta e bëri këtë thirrje pak ditë pasi Instituti i Gjeoshkencës, Energjisë, Ujit dhe Mjedisit lajmëroi për një periudhë me kushte të rënduara atmosferike dhe për rrezik përmbytjesh, veçanërisht në ultësirën veriperëndimore.

Lexoni gjithashtu:

Reshje intensive shiu deri më 11 janar, IGJEUM paralajmëron përmbytje

Përkeqësim i motit, Adiola Bani: Zonat që do jenë më të rrezikuara nga reshjet e shiut