Meta letër Gjykatës Kushtetuese: Rrëzimi i kërkesës së KLSH rrezikon financat në pushtetin vendor

Presidenti Ilir Meta i është drejtuar me një letër Gjykatës Kushtetuese pas vendimit të kësaj të fundit për të rrëzuar një padi të Kontrollit të Lartë të Shtetit.

Në letrën e tij Kreu i Shtetit kundërshton vendimin e Gjykatës duke u kërkuar anëtarëve të saj që “të mos ndikohen nga asgjë tjetër përveçse Kushtetuta në vendimet që marrin”.

Gjykata Kushtetuese rrëzoi me shumicë votash kërkesën e Kryetarit të KLSH-së Arben Shehu për “shfuqizimin si të papajtueshëm me Kushtetutën të Nenit 50 në pikat 1 dhe 2 të ligjit për financat e vetëqeverisjes vendore”.

Meta ngre alarmin se një vendim i tillë mund të rrezikojë financat publike dhe i kërkon KLSH-së që “të angazhohet për të realizuar një kontroll të plotë të mënyrës së përdorimit të fondeve publike, deri në formimin e Parlamentit të ri që do të dalë nga zgjedhjet e 25 prillit”.