Meta takon ambasadorët e SHBA dhe BE: E diela do jetë ditë feste për të gjithë

Presidenti i Republikës, Ilir Meta, ka pritur në takim ambasadorët e Shteteve të Bashkuara të Amerikës dhe të vendeve të Bashkimit Evropian, ku theksi kryesor i bisedës është vendosur tek procesi zgjedhor.

Me anë të një njoftimi të shpërndarë për mediat, z. Meta thotë se ka falënderuar trupën diplomatike për interesimin që kanë treguar, që zgjedhjet e 25 prillit të jenë të lira dhe të ndershme.

Sipas njoftimit, kreu i shtetit ka kërkuar praninë e shtuar të vëzhguesve ndërkombëtarë në Durrës, Elbasan, Vlorë pasi këto qarqe sipas tij kanë pasur probleme në zgjedhjet e kaluara, ku qytetarët janë trysnuar nga “krimi i organizuar”.

Presidenti po ashtu ka kërkuar nga Policia e Shtetit dhe institucionet gjyqësore të dëshmojnë sjellje profesionale në këtë proces elektoral. Ai thekson se është me vlerë jetike parandalimi i çdo tentative, që synon përsëritjen e krimeve zgjedhore.

“Kushdo që provokon tension artificial, duke synuar dekurajimin e votimit masiv apo tjetërsimin e votës së qytetarëve, duhet të marrë përgjigjen e menjëhershme dhe të prerë të forcës së ligjit’, thuhet në njoftim.

Pavarësisht incidenteve të raportuara deri tani, kreu i shtetit thotë se dita e diel do jetë ditë feste për qytetarët dhe demokracinë.

“E diela do të jetë një ditë feste për të gjithë shqiptarët, pasi në këto zgjedhje ata do të kenë mundësinë e përzgjedhjes jo vetëm të alternativës më bindëse për secilin por edhe të kandidatit që ata besojnë më shumë”, thekon Meta.