Meta thirrje palëve politike: Jepuni shqiptarëve atë që meritojnë, besimin në zgjedhje dhe demokraci

Presidenti Ilir Meta vlerësoi si pozitive angazhimin e ambasadorëve për të nxitur marrëveshje mes palëve për sa i përket reformës zgjedhore dhe apeloi që mazhoranca e opozita të gjejnë sa më parë konsensusin pasi në këtë mënyrë Shqipëria do të marrë një vrull për integrimin në Bashkimin Evropian.

Në konferencën për shtyp që u zhvillua mesditën e së premtes, Meta tha se nuk ishte përfshirë në bisedimet mes palëve për sa i përket reformës zgjedhore. Ai zbuloi se opozita nuk kishte vendosur kusht për reformën qeveri tranzitore dhe u shpreh se mungesa e një kushti të tillë “e bën konsensusin të mundshëm”.

Presidenti tregoi se gjatë ditës së sotme kishte pasur një telefonatë me Kryetarin e Partisë Demokratike, Lulzim Basha, por nuk zbuloi detaje për këtë çështje teksa u kërkoi të gjithë aktorëve politikë se tashmë është koha që “t’u japin shqiptarëve atë të drejtë që u takon, besimin te zgjedhjet e te demokracia”.

Meta refuzoi të komentojë rreth takimit me Ambasadoren Amerikane, Yuri Kim duke thënë veçse takimi ishte pozitiv dhe se SHBA-të mbështesin anëtarësimin e Shqipërisë në BE.

I pyetur rreth takimit me Presidentin e Kosovës Hashim Thaçi dhe nëse kishte biseduar me të rreth akuzave të tija pak javë më parë se ka një lob-pro serb që i interesojnë trazirat në Shqipëri, Presidenti Meta tha se nuk kishte folur rreth kësaj teme, por për vazhdimësinë e Kosovës në forcimin e institucioneve të saj.

Në fund të konferencës Meta përshëndeti dhe falënderoi ish-Kryeministrin Albin Kurti teksa e vlerësoi si shembull pozitiv respektimin e vendimeve të institucioneve nga palët politike në Kosovë.

Lexoni gjithashtu:

Meta denoncon përpjekjen për të uzurpuar KLSH-në, apel kreut aktual të mos u bindet urdhrave

Ambasadorja Yuri Kim në zyrën e presidentit. Opozita ende pa vendim për reformën zgjedhore 

Meta kundërshton marrjen borxh me urgjencë të 650 milionë eurove

Meta i dërgon Kuvendit propozimin e katërt për kryetar të Kontrollit të Lartë të Shtetit