MIE prishi kontratën me “Kurum”, PD: 100 mln euro të tjera rrezikojnë të dalin nga xhepat e shqiptarëve

Çështjet e humbura në arbitrazh i kushtojnë taksapaguesve shqiptarë 153 mln euro, ndërsa barra financiare mund të rëndohet pas padisë së fundit të “Kurum” në Gjykatën Ndërkombëtare. Partia Demokratike akuzon qeverinë Rama për prishjen e kontratës koncesionare të përpunimit të kontejnerëve në Portin e Durrësit.

“Këto ditë, një tjetër kompani e huaj paditi në arbitrazh qeverinë shqiptare. Kjo kompani, të cilës iu ndërpre kontrata e terminalit në portin kryesor të vendit, kërkon jo pak, por 100 milionë euro dëmshpërblim për prishje të padrejtë kontrate”, tha Eno Bozdo, anëtar i kryesisë së PD-së.

Kompania “Durrës-Kurum Shipping” dhe investitorë të tjerë në koncesionin e përpunimit të kontejnerëve në port, kanë bërë një padi në arbitrazh pas prishjes së kontratës nga një gjykatë shqiptare dhe sekuestrimin e terminalit nga përmbaruesit.

Anulimi i koncesionit është ekzekutuar disa muaj më parë, pas një beteje të gjatë ligjore për prishjen e kontratës midis kompanisë turke dhe Ministrisë së Infrastrukturës dhe Energjisë.

Kontrata me afat 35 vjet, u firmos në vitin 2013 nga Ministria Transporteve dhe kompania “Kurum” do të investonte 35 milionë dollarë në këtë terminal.

Lexoni gjithashtu: 

Humbja 44 mln euro për rrugën Tiranë-Elbasan, Braçe i ashpër: Të hetohet nga e para, politika angazhohet të fshehë krimin

Punimet e rrugës Tiranë-Elbasan, PS ia faturon humbjen €44 milionë në arbitrazh abuzimeve nga PD dhe LSI

Arbitrazhi për rrugën Tiranë-Elbasan, PD: Shteti shqiptar do të paguajë 44mln euro